ABŞ və Rusiya Əbu-Dabidə razılığa gəldilər

Birləşmiş Ərəb Əmirliklərinin paytaxtı Əbu-Dabidə keçirilən danışıqlar zamanı Rusiya və ABŞ nümayəndələri hərbi qurumlar arasında dialoqu yüksək səviyyədə bərpa etmək barədə razılığa gəliblər.

presstvaz-ın “İnterfaks”a istinadən xəbərinə görə, bu barədə ABŞ Silahlı Qüvvələrinin Avropa Komandanlığından (EUCOM) məlumat verilib.

Məlumatda qeyd olunub ki, bu dialoq 2021-ci ilin payızında dayandırılıb.

Vurğulanır ki, bu cür kommunikasiya kanalı tərəflərə davamlı əlaqə saxlamağa imkan verəcək və bunun sayəsində də tərəflər dünyada sabitliyin qorunması üzərində işləyə biləcəklər.

“Hərbçilər arasında dialoqun dəstəklənməsi qlobal sabitlik və sülh üçün vacib amildir, şəffaflığın artırılması və gərginliyin azaldılması üçün vasitələr təqdim edir”, – deyə məlumatda bildirilib.

Bundan əlavə, qeyd edilib ki, NATO-nun Avropadakı Birləşmiş Silahlı Qüvvələrinin baş komandanı, general Aleksus Qrinkeviç artıq Rusiya Silahlı Qüvvələrinin Baş Qərargah rəisi Valeri Gerasimovla hər hansı tərəfdən istənməyən gərginliyin yaranmasının qarşısının alınması üzrə yollar tapmaq üçün davamlı dialoq aparmaq səlahiyyətinə malikdir.