Yasamal rayonunda oğurluq faktı üzrə əməliyyat keçirilib

Qapıları yoxlayaraq mənzillərdən oğurluq edən şəxs saxlanılıb

        Daxili İşlər Nazirliyinin rəsmi mənbələrindən presstvaz-a daxil olan məlumata əsasən,
Yasamal rayonunda mənzillərin giriş qapılarını yoxlayaraq açıq olan evlərdən birinə daxil olmaqla oğurluq törədilməsi barədə polisə məlumat daxil olub.

Diqqət çəkməmək məqsədilə müxtəlif geyimlərdən istifadə edən naməlum şəxs bu üsulla bir mənzildən 900 manat nağd pul, həmçinin 38 800 manat dəyərində qızıl-zinət əşyalarını talayıb.

        Yasamal Rayon Polis İdarəsinin əməkdaşları tərəfindən keçirilən tədbirlərlə əməli törətməkdə şübhəli bilinən Mətanət Hüseynova saxlanılıb. Onun üzərindən oğurlanan qızıl-zinət əşyalarının bir qismi aşkarlanaraq maddi sübut kimi götürülüb.

Faktla bağlı Cinayət Məcəlləsinin oğurluq maddəsi ilə cinayət işi başlanılıb. Hazırda talanmış əmlakın qalan hissəsinin aşkar edilməsi və iş üzrə digər halların müəyyənləşdirilməsi istiqamətində istintaq tədbirləri davam etdirilir.

        Vətəndaşlara mənzillərin giriş qapılarını açıq saxlamamaları, şəxsi əmlaklarının təhlükəsizliyinə diqqətlə yanaşmaları və şübhəli hallarla qarşılaşdıqları zaman dərhal polisə məlumat vermələri tövsiyə olunur.

presstvaz  – Azərbaycanın etibarlı informasiya mənbəyi