NİİM ötən il qeydə alınan qəzalar və nəqliyyat sıxlığı ilə bağlı məlumat yayıb

Paytaxt yollarında yol-nəqliyyat hadisələrinin əsas səbəbləri açıqlanıb

          Daxili İşlər Nazirliyinin rəsmi mənbələrindən presstvaz-a daxil olan məlumata əsasən,
DİN-in Nəqliyyatı İntellektual İdarəetmə Mərkəzinin paytaxt yollarında quraşdırılmış videomüşahidə kameralarının əhatə dairəsində ötən il ərzində 2546 yol-nəqliyyat hadisəsi qeydə alınıb. Aparılan təhlillər göstərib ki, qəzaların əsas səbəbləri yüksək sürət, svetoforun qadağanedici işarəsində hərəkət, düzgün ara məsafəsinin seçilməməsi, yol nişanlarının tələblərinin pozulması və sürücü diqqətsizliyidir.

Hadisələr əsasən avtomobillərin intensiv hərəkət etdiyi Ziya Bünyadov, Heydər Əliyev, Babək, 8 Noyabr, Tbilisi prospektlərində, Bakı–Sumqayıt, Aeroport, Sabunçu–Zabrat şoselərində və digər əsas yollarda baş verib.

           Məlumata görə, il ərzində 1889 texniki nasaz nəqliyyat vasitəsinin yolda qalması süni nəqliyyat sıxlığının yaranmasına səbəb olub. Qəzalar və nasaz avtomobillərlə bağlı NİİM və Bakı şəhər Dövlət Yol Polisi İdarəsinin əməkdaşları tərəfindən operativ tədbirlər görülüb.

Bakıda nəqliyyat axınının intensivliyini artırmaq məqsədilə 60 küçə və prospekt üzrə svetoforlara 73 min 717 dəfə “yaşıl dalğa” rejimi tətbiq edilib.

          Həmçinin məlumat-sürət portalları vasitəsilə yollarda sıxlıq, təmir işləri, hava şəraiti və qəza halları barədə sürücülər məlumatlandırılıb, təhlükəsizliyin təmin edilməsi məqsədilə il ərzində sürət hədləri 63 dəfə endirilib.

   presstvaz  – Azərbaycanın etibarlı informasiya mənbəyi