“Mançester Yunayted”in əfsanəvi kapitanının qardaşı ölü tapıldı

“Mançester Yunayted”in və Serbiya millisinin keçmiş kapitanı Nemanya Vidiçin qardaşı Duşan Belqradda ölü tapılıb.

presstvaz xarici mediaya istinadən xəbər verir ki, hadisənin təfərrüatları hələ açıqlanmayıb.

Faciənin başvermə səbəbləri açıqlanmayıb. Vidiçin ailəsi də hadisə barədə heç bir rəsmi açıqlama verməyib.

Vidiç qardaşları gənclik illərində “Yedinstvo Putevi” klubunda birgə məşq ediblər. Nemanya peşəkar futbol karyerasına davam etsə də, Duşan idmandan uzaqlaşıb.

Qeyd edək ki, Nemanya Vidiç bütün dövrlərin ən uğurlu serb futbolçularından biri hesab olunur. O, karyerasını “Yedinstvo”dan sonra “Srvena Star Belqrad”da davam etdirib və burada məşhurlaşıb. Oradan “Spartak Moskva”ya keçib və 2006-cı ildə “Mançester Yunayted”ə transfer olunub.

Vidiç “Old Trafford”da karyerasının ən uğurlu dövrünü yaşayıb. O, beş Premyer Liqa titulunu, 2008-ci ildə UEFA Çempionlar Liqasını, FIFA Klublararası Dünya Kubokunu qazanıb. O, iki dəfə Premyer Liqada mövsümün oyunçusu seçilib və klubun ən dominant dövrlərindən birində “Mançester Yunayted”in kapitanlığını edib.

Beynəlxalq arenada Vidiç Serbiya milli futbol komandasında 50-dən çox oyun keçirib, komandanın kapitanı olub və ölkəsini 2010-cu il FIFA Dünya Kubokunda təmsil edib. O, “İnter”də qısa müddət oynadıqdan sonra 2016-cı ildə peşəkar futboldan ayrılıb.