"Bluetooth" ilə izlənilə bilərsiniz

Belçikanın Leuven Universitetində çalışan alimlər bir çox "Bluetooth" aksesuarında təhlükəli boşluqlar aşkar ediblər. Bu boşluqlar kiberhücumçulara istifadəçiləri gizli şəkildə izləmək və ya dinləmək imkanı yarada bilər.

presstvaz-ın məlumatına görə, "PhoneArena" nəşri kibertəhlükəsizlik üzrə mütəxəssislərə istinad edərək bildirir ki, "WhisperPair" adı verilən bu zəifliklər Sony, JBL, Marshall, Xiaomi və Nothing kimi tanınmış markaların bəzi qulaqlıq modellərində mövcuddur.

Məlumata əsasən, problem smartfonların qulaqlıqları avtomatik tanıyıb sürətli şəkildə qoşulmasına imkan verən mexanizmlə bağlıdır. Bu texnologiya rahatlıq baxımından üstün olsa da, kifayət qədər güclü təhlükəsizlik yoxlaması aparmır.

Araşdırmalar göstərib ki, hücumçular təxminən 15 metr məsafədən Bluetooth bağlantısı vasitəsilə başqa bir şəxsin qulaqlığına xəbərsiz şəkildə qoşula bilirlər. Bu isə onlara səsləri dinləmək, yazmaq, hətta istifadəçinin yerini müəyyən etmək kimi ciddi risklər yaradır.