“Nestle” uşaq qidalarını geri çağırır: Ölkəmizdə satılan məhsullarda təhlükə var?

“Nestle” şirkəti tərəfindən körpə və azyaşlılar üçün nəzərdə tutulmuş bəzi qida məhsullarının ehtiyat tədbiri olaraq geri çağırılması barədə qərar qəbul edilib. Buna səbəb istehsal prosesi zamanı məhsulların “Bacillus cereus” bakteriyası tərəfindən hasil olunan sereulid toksini ilə çirklənmə ehtimalıdır.

Bəs sereulid toksini nədir və körpələr üçün nə dərəcədə təhlükəlidir?

Həkim Adil Qeybulla məsələyə aydınlıq gətirib: “Bu maddələrin orqanizmdə yığılaraq xüsusilə də böyüyən uşaq orqanizmində, limfa sistemində, sümük toxumasında gələcəkdə çox ciddi fəsadlar vermə ehtimalı var”.

Qida mütəxəssisi Məhsəti Hüseynova isə valideynlərə xəbərdarlıq edərək bildirib: “Əgər bu kimi məhsullar Azərbaycanda da istifadə edilirsə, təbii ki, satışda var. Mütləq şəkildə hər bir ana diqqətli olmalıdır. Həmin partiyaları yoxlamalıdırlar. Əgər uşaqlarda hər hansı bir narahatlıq varsa – mədədə ağrı, köp, ürəkbulanma və ya uzun müddət davam edən ishal müşahidə edilirsə, mütləq şəkildə həkimə müraciət etsinlər”.