KİV: Çinin yeni taktikası regionda güc balansını dəyişə bilər

Çin yük gəmilərini hücum dronları üçün “aviadaşıyıcı gəmi”lərə çevirir və onları dronları birbaşa göyərtədən buraxmaq üçün elektromaqnit katapultlarla təchiz edir.

presstvaz xəbər verir ki, bu barədə “The War Zone” nəşri peyk görüntülərinə istinadən məlumat yayıb.

Jurnalistlərin məlumatına görə, Şanxaydakı “Hudong-Zhonghua” gəmiqayırma zavodunda döyüş gəmisinə çevrilmiş mülki yük gəmisi görülüb. Gəminin yaxınlığında gizli, uzunqanadlı “Collaborative Combat Aircraft” tipli döyüş dronları olub.

Qeyd olunub ki, əvvəllər konteynerlə silah daşınması üçün istifadə edilən bu gəmi, indi müasir dronlar üçün çoxfunksiyalı daşıyıcıya çevrilib.

Jurnalistlərin diqqətini yük maşınlarına quraşdırılmış fərdi seqmentlərdən ibarət modul atış sistemi çəkib. Bu sistem müxtəlif missiyalar üçün tez bir zamanda yerləşdirilə və ya dəyişdirilə bilər.

Beləliklə, Çin yeni bir taktika nümayiş etdirərək mülki gəmiləri dənizdən sürətlə hücum dronları buraxa bilən hərbi platformalara çevirir. Bu, regionda güc balansını və dəniz müharibəsinə yanaşmaları əhəmiyyətli dərəcədə dəyişdirə bilər.