İflic olmuş çinli bir barmağı ilə “ağıllı” ferma düzəltdi

Yalnız bir barmağını hərəkət etdirə bilən iflic olmuş çinli kişi “ağıllı” ferma idarəetmə sistemi hazırlayıb və öz startapını qurub.

presstvaz xəbər verir ki, bu barədə “South China Morning Post” məlumat yayıb.

Li Xia adlı çinliyə hələ beş yaşında əzələ distrofiyası diaqnozu qoyulub. O, beşinci sinifdən sonra məktəbə gedə bilməsə də, həyatı boyu müstəqil təhsil almağa davam edib.

Gənc ən çox fizika və kompüter elmləri ilə maraqlanır və 25 yaşında onlayn forumlardan proqramlaşdırma öyrənməyə başlayır.

Linin vəziyyəti tədricən pisləşir. Əvvəlcə yerimək qabiliyyətini itirib, sonra özünə qulluq edə bilmir. Nəhayət, hətta yemək və nəfəs almaq belə onun üçün çətinliyə çevrilir. 36 yaşlı Li indi yalnız bir əl və bir ayaq barmağını hərəkət etdirə bilir.

2021-ci ilin əvvəllərində o, torpaqsız əkinçilik ideyası ilə tanış olur. Burada bitkilər qida maddələrini torpaq vasitəsilə deyil, su məhlulu vasitəsilə əldə edirlər.

O, əşyaların interneti texnologiyalarını müasir kənd təsərrüfatı texnologiyaları ilə birləşdirmək qərarına gəlir. Süni tənəffüs aparatına qoşulan çinli virtual klaviaturadan istifadə edərək bütün ferma üçün tam funksional ağıllı idarəetmə sistemi hazırlayır. Anası ona fermanın fiziki hissəsini yığmağa kömək edir.

İndi Linin ferması sabit gəlir gətirir və hazırda yalnız göyərti yetişdirir. Lakin o, çeşidini genişləndirməyi və çerri pomidorları yetişdirməyi də planlaşdırır.