“Haber Global”: “Bir milyon lirəyə qarşı 200 milyon – Superliqada mərc oyunları üzrə istintaqı sarsıdan matç”

“Mərc oyunu deyildiyi zaman təkcə 20-50 lirə dəyərində kuponlar ağla gəlməməlidir, nisbətlər yüzlərlə dəfə artıq ola bilir”.

presstvaz-ın xəbərinə görə, bu sözləri “Haber Global” “YouTube” kanalının videosüjetində televiziyanın idman yayımları koordinatoru Fatih Demirkol deyib.

Fatih Demirkol və aparıcı Selver Gözüaçıkın təqdim etdiyi verilişdə Türkiyə futbolunda gündəmi sarsıdan mərc və danışılmış oyunlarla bağlı istintaq ətraflı şəkildə müzakirə edilib.

Verilişdə xüsusilə bəzi qarşılaşmalarda ortaya çıxan qeyri-adi mərc fəaliyyətləri, yüksək məbləğdə pul köçürmələri və bu vəziyyətin futbolun etibarlılığına təsiri kimi məsələlər qiymətləndirilib.

“Bu, adi bir ittiham aktı deyil. Prokurorluq MASAK hesabatlarından tutmuş bank əməliyyatlarına, HTS qeydlərindən tutmuş keçmiş intizam qərarlarına qədər çox geniş dəlillər toplusu ilə işi davam etdirir. Bu da məsələnin nə qədər dərin olduğunu göstərir”, – deyə Fatih Demirkol istintaqın ciddiliyinə diqqət çəkərək bildirib.

Demirkol, həmçinin prosesin yalnız fərdləri deyil, bütünlüklə Türkiyə futbolunu da təsir altına aldığını vurğulayıb.

O, mərc sisteminin necə işlədiyini və niyə ciddi risk sahəsi yaratdığını nümunələrlə izah edib.

“Mərc oyunu deyildiyi zaman yalnız 20-50 lirə dəyərində kuponlar ağla gəlməməlidir. Fərqli və çox az ehtimal olunan təxminlər bir araya gələrək nisbətləri yüzlərlə dəfə artıra bilir”, – deyə Fatih Demirkol qeyd edib.

O, çox sadə bir nümunə gətirərək qeyd edib ki, birinci hissənin hesabı, qaçırılan penalti və qeyri-adi qol ssenariləri kimi proqnozlar eyni kuponda birləşdirilərsə, qoyulan pul nəzəri olaraq 200 dəfəyə qədər arta bilər.

“1 milyon lirəyə qarşı 200 milyon lirə kimi rəqəmlər kağız üzərində mümkün görünür. Bax, prokurorluğun diqqətini çəkən də bu dəhşətli pul axınıdır”, – deyə o əlavə edib.

Fatih Demirkol vurğulayıb ki, bu səbəblə də mərc oyunları ilə bağlı istintaqa qeyri-ciddi yanaşılmamalıdır, çünki kiçik məbləğlərlə oynanıldığı təəssüratı yaradan sistemin pərdəarxasında olduqca böyük pullar dövr edə bilir.

Daha ətraflı videosüjetdə: