Metropolitenin bağlanmış banklardakı pulu geri qaytarılmayıb

“Bakı Metropoliteni” QSC-nin 2016-cı ildə fəaliyyətini dayandırmış iki bankda yerləşdirilmiş 3.7 milyon manata yaxın vəsaiti indiyədək geri qaytarılmayıb.

presstvaz QSC-nin açıqladığı sonuncu hesabata istinadən xəbər verir ki, sözügedən məbləğ şirkətin cari bank hesablarında nəzərə alınsa da, faktiki olaraq istifadəsiz qalıb. Bildirilib ki, vəsaitlərin geri alınması məqsədilə aidiyyəti qurumlara müraciətlər edilsə də, maliyyə hesabatlarının təsdiqləndiyi tarixədək nəticə əldə olunmayıb. Bu səbəbdən həmin məbləğ üzrə gözlənilən zərərlər tanınaraq ehtiyat ayrılıb.

“Bakı Metropoliteni”nin vəsaitlərinin 1 milyon 563 min manatı “Texnikabank” ASC-də, 2 milyon 166 min manatı isə “Bank Standard”da qalıb. Ümumi məbləğ 3 milyon 709 min manat təşkil edir.

Şirkətin 2024-cü ilin sonuna dair maliyyə hesabatında qeyd olunur ki, zərər ehtiyatı çıxıldıqdan sonra pul vəsaitləri və onların ekvivalentləri 9 milyon 839 min manat səviyyəsində formalaşıb. Bu göstərici 2023-cü ilin (3.891 milyon manat) müvafiq dövrü ilə müqayisədə əhəmiyyətli artım deməkdir.

Hesabatda eyni zamanda vurğulanır ki, məhdudiyyət qoyulmuş pul vəsaitləri xarici təchizatçılar qarşısında öhdəliklərin təminatı məqsədilə girov kimi istifadə olunur və onlara çıxış müqavilə şərtləri ilə məhdudlaşdırılıb.