Bakıda yeddi ay əvvəl təmirə bağlanan mərkəzi küçələrdən birində İŞLƏR YEKUNLAŞIR

“Ağ şəhər” yol infrastruktur layihələri çərçivəsində Süleyman Vəzirov küçəsinin bir hissəsində – Xəqani Rüstəmov küçəsi ilə kəsişməsindən Babək prospektinə qədər olan ərazidə aparılan yenidənqurma işlərini yekunlaşmaq üzrədir.

presstvaz xəbər verir ki, bu barədə Azərbaycan Avtomobil Yolları Dövlət Agentliyi (AAYDA) məlumat yayıb.

Bildirilib ki, uzunluğu 1100 metr olan sözügedən küçənin hərəkət hissəsinin eni 14 metr təşkil edir.

“Yenidənqurma işləri çərçivəsində avtonəqliyyat vasitələrinin parklanmasının təmin edilməsi məqsədilə 2.5 metr enində xüsusi zolaqlar yaradılıb.

Ərazidə yeni asfalt-beton örtüyü döşənib, avtonəqliyyat vasitələrinin rahat və təhlükəsiz hərəkətinin təşkili üçün işıqforlar və siqnal dirəkləri quraşdırılıb.

Hazırda mövcud piyada səkilərinin bərpası, 5 metr enində yeni səkilərin tikintisi, eləcə də bəzək daşlarının (tamet) vurulması işləri yekunlaşmaq üzrədir.

“İnşaat Norma və Qaydaları”nın tələblərinə uyğun olaraq, zəruri ərazilərdə yol nişanlarının quraşdırılması, yol cizgilərinin, yolgöstəricilərin və piyada zolaqlarının çəkilməsi işləri də aparılacaq. Küçənin sözügedən hissəsi yaxın müddətdə müasir görkəmdə vətəndaşların istifadəsinə veriləcək”, – məlumatda qeyd olunub.