Qalib Bayramov məhkəmədə ifadə verib

İqtisadi Tədqiqatlar Mərkəzi İctimai Birliyinin Mərkəzi İdarə Heyətinin sədri, iqtisadçı Qalib Bayramovun cinayət işi üzrə məhkəmənin növbəti prosesi keçirilib.

Oxu Az-ın məlumatına görə, Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən prosesdə təqsirləndirilən Qalib Bayramov sərbəst ifadə verib.

“Mən heç bir siyasi prosesdə iştirak etməmişəm. Sadəcə Azərbaycanın Avropa prinsiplərinə uyğun olaraq iştirak etdiyi “açıq hökumət” təşəbbüsü proqramında aktiv iştirak etmişəm. Azərbaycan hökuməti bu təşəbbüsə qoşulan ilk və aparıcı ölkələrdən biri olub. Mən “Korrupsiyaya qarşı mübarizə” İctimai Birliyində birbaşa iştirak etməmişəm. Lakin könüllü fəaliyyətim mövcud olub. Təşkil etdiyim tədbirlərdə dövlət qurumlarının nümayəndələri, Miqrasiya Xidmətinin rəisi Vüsal Hüseynov da iştirak ediblər. Bununla bağlı internetdə olan videolardan da açıq-aydın görünür. Tədbirlərimi Əliməmməd Nuriyevin ofisində təşkil etmişəm”, – deyə o bildirib.

Qrantlarla bağlı Qalib Bayramov bildirib ki, bütün proses qanunvericiliyin tələblərinə uyğun keçirilib:

“Aldığımız qrantlarla əlaqədar müqavilələrimiz və sənədlərimiz də mövcuddur. Həmin müqavilələr yeni qrant haqqında qanunun qəbulundan öncə baş verdiyi üçün əvvəlki qanunla tənzimlənirdi. Yeni qanundan sonra mən nə Azərbaycandan, nə də digər ölkələrin buradakı nümayəndələrindən qrant almışam. Yalnız tenderlərdə iştirak etmişəm”.

Təqsirləndirilən ona qarşı irəli sürülən qanunsuz qrant alma ittihamlarını isə belə cavablandırıb:

“Mənim gördüyüm işi həmin dövrdə digərləri də görürdülər. Lakin məsuliyyətə yalnız mən cəlb edilmişəm. Bunu ona görə demirəm ki, digərlərini də cəlb edəsiniz. Sadəcə özümü aydın olmayıb”.

Vaxt məhdudiyyəti ilə əlaqədar o, ifadəsinə növbəti prosesdə davam edəcək. Proses yanvarın 21-də keçiriləcək.

Qeyd edək ki, Qalib Bayramova qarşı Cinayət Məcəlləsinin 193-1.3.2-ci (cinayət yolu ilə əldə edilmiş əmlakı leqallaşdırma xeyli miqdarda törədildikdə ), 308-ci (vəzifə səlahiyyətlərindən sui-istifadə) maddələri ilə ittiham irəli sürülüb. Onun barəsində polis nəzarəti altına vermə qətimkanı seçilib.