Kürdəmirdə üç nəfərin öldüyü qəzada təqsirli bilinən şəxsə hökm oxundu

Kürdəmir rayonunda üç nəfərin öldüyü qəza ilə bağlı təqsirli bilinən 1992-ci il təvəllüdlü Əflatun Umudovun cinayət işinə baxılıb.

presstvaz “Teleqraf”a istinadən xəbər verir ki, Lənkəran Ağır Cinayətlər Məhkəməsində hakim Neymət Məmmədovun sədrliyi ilə keçirilən prosesdə hökm elan edilib.

Umudov üç il müddətə nəqliyyat vasitələrini idarə etmək hüququndan və beş il müddətə azadlıqdan məhrum olunub.

Cəzasını məntəqə tipli cəzaçəkmə müəssisəsində çəkməsi müəyyən edilib.

Qeyd edək ki, hadisə ötən il iyunun 18-də Kürdəmir rayonu, Cəyli kəndi ərazisində baş verib. “Mercedes-Benz” markalı avtomobil idarəetməni itirərək yolun kənarına aşıb.

Ceyhun Ağanəzər oğlu Xanəliyev, Toğrul Hikmət oğlu Xanəliyev və Süleyman Qarakişi oğlu Əhmədov vəfat ediblər. Sükan arxasında olan Əflatun Əflan oğlu Umudov isə xəsarət alıb.

İstintaq araşdırması zamanı Umudov təqsirli bilinib. Onun barəsində Cinayət Məcəlləsinin 263.3-cü maddəsi ilə ittiham elan edilib.

İş üzrə ifadə verən təqsirləndirilən şəxs özünü təqsirli bilib. O, ifadəsində göstərib ki, avtoqəza nəticəsində avtomobilində dünyasını dəyişənlərin hamısı yaxınları olublar:

“Ceyhun Xanəliyev dayım oğlu, Toğrul Xanəliyev sinif yoldaşım, həm də Toğrulun atası ilə anam əmi qızı əmi oğlu, Süleyman Əhmədov isə dayım oğlu Ceyhunun bacanağı olublar. Hadisə Toğrulla birlikdə Ceyhun və Süleymanı rayon mərkəzinə tərəf aparan zaman baş verib. Hadisənin necə baş verməsini xatırlamamışam. Xəstəxanaya gedən zaman təcili tibbi yardım maşınında ayılmışam”.