Bakıda qazi adı ilə avtomobilin nömrəsini gizlədən şəxs həbs edildi

Bakının Qaradağ rayonunda avtomobilin nömrəsini gizlədərək idarə edən sürücü həbs edilib.

presstvaz-ın məlumatına görə, hadisə rayonun Lökbatan qəsəbəsində baş verib.

Astara rayon sakini, 1991-ci il təvəllüdlü şəxs “Niva” avtomobilinin dövlət qeydiyyat nişanını dəsmalla bağlayıb hərəkətdə olarkən yol patrul xidmətinin əməkdaşları tərəfindən saxlanılıb. Sürücü dəfələrlə nizam-intizama dəvət edilsə də, o buna məhəl qoymayıb. Yol polisi şöbəsinin əməkdaşlarının araşdırmaları zamanı məlum olub ki, həmin şəxsin sürücülük vəsiqəsi yoxdur və avtomobili sürücülük hüququ olmadan idarə edir. Avtomobil duracağa yerləşdirilərkən həmin şəxs qazi olduğunu bildirib. Yoxlama zamanı onun qazi olmadığı, yalandan qazi adından istifadə etdiyi aşkarlanıb.

O saxlanılıb və faktla bağlı İnzibati Xətalar Məcəlləsinin 510 (xırda xuliqanlıq) və 535.1-ci (polis və ya hərbçinin qanuni tələbinə məhəl qoymamaq) maddələri ilə protokol tərtib olunub.

Qaradağ Rayon Məhkəməsinin qərarı ilə şəxs 10 gün inzibati qaydada həbs edilib.