ABŞ-də Martin Lüter Kinqin silahdaşı xəstəxanaya yerləşdirildi

Martin Lüter Kinqin aparıcı müttəfiqlərindən biri və amerikalı vətəndaş hüquqları müdafiəçisi Cessi Cekson mütərəqqi supranüvə iflici (Progressive Supranuclear Palsy – PSP) diaqnozu ilə xəstəxanaya yerləşdirilib.

presstvaz xəbər verir ki, bu barədə CNN televiziya kanalı məlumat yayıb.

Qeyd olunub ki, 84 yaşlı aktivist artıq on ilə yaxındır ki, neyrodegenerativ xəstəliklə mübarizə aparır, lakin son vaxtlar onun vəziyyəti kəskin şəkildə pisləşib.

Cekson 1960-cı illərin əvvəlində hüquq müdafiəsi və aktiv fəaliyyətə başlayıb, bu zaman o, Martin Lüter Kinq tərəfindən təşkil edilmiş Alabama ştatında qaradərili əhalinin vətəndaş hüquqları uğrunda mübarizə hərəkatına qoşulub. Sonradan o, Lüter Kinqin əsas silahdaşlarından birinə çevrilib və onun ölümünə qədər onunla işləyib. Lüter Kinqin rəhbərlik etdiyi Cənubun Xristian Liderləri Konfransı adlı hüquq müdafiəsi təşkilatında Cekson təşkilatın iqtisadi proqramına cavabdeh olub.

1980-ci illərdə Cekson ABŞ Prezidenti Ronald Reyqanın amerikalıların həssas qruplarının vətəndaş və sosial hüquqları sahəsində siyasətinə qarşı çıxan öz hüquq müdafiəsi təşkilatını yaradıb. Cekson dəfələrlə Demokrat Partiyasının praymerizdə ölkə prezidenti vəzifəsinə öz namizədliyini irəli sürüb, ikinci və üçüncü yerləri tutub. Beynəlxalq fəaliyyəti çərçivəsində o, Kuba lideri Fidel Kastro və Venesuela lideri Uqo Çaveslə görüşüb, bu ölkələrlə ABŞ arasındakı münasibətlərdə gərginliyin azaldılmasına çalışıb.