Rusiyadan buğda daşıyan qatar Azərbaycan ərazisindən keçməklə Ermənistana çatıb

Rusiyadan Azərbaycan üzərindən dəmir yolu ilə daşınan ilk buğda partiyası artıq Ermənistana çatıb.

presstvaz Ermənistan KİV-ə istinadən xəbər verir ki, bu barədə Ermənistanın iqtisadiyyat naziri Geqam Papoyan bildirib.

Onun sözlərinə görə, yükün ilk partiyası “Ayrum” stansiyasına gətirilib: “Bu, tarixi gündür. Demək olar ki, 35 ildən sonra ilk dəfə olaraq yük Azərbaycan ərazisindən dəmir yolu ilə Ermənistana çatdırılıb”, – nazir vurğulayıb.

O bildirib ki, ilk partiya Rusiyadan gətirilən buğdadır, ikinci partiya isə Qazaxıstandan gələcək.

Qeyd edək ki, hazırda Qazaxıstan buğdası Azərbaycan ərazisindədir və noyabrın 7-ə qədər Ermənistana çatacağı gözlənilir. Ümumi çəkisi 1000 ton olan buğda 15 vaqonla daşınır.

05 noyabr, 17:08

Qazaxıstan taxılının Azərbaycan üzərindən Ermənistana daşınmasına başlanılıb.

presstvaz “Report”a istinadla xəbər verir ki, Qazaxıstandan gələn 15 vaqon buğda noyabrın 5-də Azərbaycan sərhədini keçərək Yalamaya doğru istiqamət götürüb.

Bildirilib ki, Yalama-Biləcəri-Hacıqabul-Böyük Kəsik marşrutu ilə daşınan yük noyabrın 4-də Rusiyadan gələn 15 vaqonun ardınca Ermənistanın Dalarik stansiyasına yola salınacaq.

Xatırladaq ki, Prezident İlham Əliyev Ermənistana yük tranziti ilə bağlı məhdudiyyətlərin aradan qaldırıldığını Qazaxıstanda verdiyi bəyanatda qeyd etmişdi.