“Axios”: “Stiven Uitkoff diqqətini İsraildə atəşkəsin möhkəmləndirilməsi üzərində cəmləşdirəcək”

ABŞ Prezidentinin sülhyaratma missiyaları üzrə xüsusi elçisi Stiven Uitkoffun və kürəkəni Cared Kuşnerin bu həftə İsrailə gözlənilən səfəri Qəzza zolağında atəşkəs rejiminin sabitləşdirilməsinə və tərəflərin sülh sazişinin növbəti mərhələsinə keçmələri üçün konkret tədbirlərin görülməsinə həsr olunacaq.

presstvaz xəbər verir ki, bu barədə “Axios” portalı yazıb.

Yazıda deyilir ki, onlar Fələstinin HƏMAS hərəkatı tərəfindən israilli girovlarının cəsədlərinin qaytarılmasına nəzarət, Qəzza zolağına humanitar yardımın daxil olması məsələləri üzrə İsrail və BMT orqanları arasında yaranan ixtilafların yoluna qoyulması tədbirlərini müzakirə edəcəklər. Bundan əlavə, Uitkoff İsrail dövlətinin nümayəndələri ilə beynəlxalq sabitləşdirici qüvvələrin yaradılmasını müzakirə edəcək, HƏMAS-ın tərksilah edilməsi və Qəzzanın hərbsizləşdirilməsinə dair yeni təkliflər verəcək.

Ağ Evin adı açıqlanmayan yüksəkvəzifəli rəsmilərindən biri “Axios”a bildirib ki, əsl iş indi başlayır. Qəzzanın infrastrukturunun mövcud vəziyyəti nəzərə alınarsa, yaxın günlərdə bələdiyyələr səviyyəsində idarə etməyi bacaran, sutəmizləyici qurğuların inşasından və onların idarə olunmasından başı çıxan adamlara çox ehtiyac olacaq.