Venesuela Norveçdəki səfirliyini bağladı: Sülh mükafatının Maçadoya verilməsinə etiraz

Venesuela hökuməti Norveç və Avstraliyadakı səfirliklərini bağladığını elan edib. Bunun əvəzinə rəsmi Karakas Zimbabve və Burkina-Fasoda diplomatik nümayəndəliklər təsis edəcək.

presstvaz-ın xəbərinə görə, bu barədə “Reuters” nəşri məlumat verib.

Rəsmi versiyaya görə, hakimiyyət milli prioritetlərin qiymətləndirilməsindən sonra resursların strateji yenidən bölüşdürülməsi məqsədilə bu addımı atıb.

Norveç Xarici İşlər Nazirliyi Oslodakı səfirliyin bağlanması ilə bağlı bildirişin alındığını təsdiqləyib.

“Bu qərar təəssüf doğurur, lakin biz Venesuela ilə dialoqu saxlamaq niyyətindəyik”, – deyə nazirlik nümayəndəsi bildirib.

Qeyd edilir ki, diplomatik nümayəndəliyin bağlanması xəbəri Norveç Nobel Komitəsinin Venesueladan olan siyasətçi, ölkədə müxalifət lideri hesab edilən Mariya Korina Maçadonu Sülh Mükafatı ilə təltif etməsindən üç gün sonra yayılıb.

Xatırladaq ki, Venesuela Prezidenti Nikolas Maduro yerli xalqların Müqavimət Günü münasibətilə keçirilən tədbirdə çıxışı zamanı Maçadonu “əhalinin 90%-i tərəfindən rədd edilən “cadugər” adlandırıb. Maduro müxalifətçinin adını çəkməsə də, dolayı yolla söhbətin məhz Nobel mükafatı laureatından getdiyinə işarə edib.