Çin ABŞ bayrağı altında üzən gəmilərə xüsusi liman rüsumu tətbiq edəcək

Çin hökuməti ABŞ bayrağı altında üzən gəmilərə xüsusi liman rüsumu tətbiq edir.

presstvaz xəbər verir ki, bu barədə məlumatı ÇXR Nəqliyyat Nazirliyi yayıb.

Qurumun bəyanatında deyilir ki, bu addım Vaşinqtonun Çin şirkətlərinə məxsus olan, yaxud onlar tərəfindən istehsal edilmiş, habelə onların istifadəsində olan və ya ÇXR bayrağı altında üzən gəmilərə qarşı oxşar tədbirlərinə cavabdır. Bildirilir ki, ABŞ bu hərəkətləri ilə beynəlxalq ticarət prinsiplərini, Çin və ABŞ arasında imzalanmış dəniz daşımaları haqqında sazişin müddəalarını ciddi şəkildə pozur, hər iki ölkənin dəniz ticarətinə ciddi ziyan vurur.

Qeyd edilir ki, qərar oktyabrın 14-dən qüvvəyə minir. Çin liman rüsumlarını həm ABŞ-nin fiziki şəxslərinin mülkiyyətində olan, həm ABŞ vətəndaşlarının birbaşa və ya dolayı yolla 25 faizdən çox səhmə sahib olduğu müəssisə və digər təşkilatların istifadəsində olan, eyni zamanda Birləşmiş Ştatlar bayrağı altında üzən, həm də bu ölkədə inşa edilmiş gəmilərə şamil edilir.

Müvafiq rüsumlar ilkin olaraq bir netto-qeydiyyat tonuna görə 400 yuan (ÇXR Mərkəzi Bankının indiki məzənnəsi ilə 56 dollar) tutulacaq. Lakin 2026-cı il aprelin 17-dən ödəniş 640 yuana (90 dollar), 2027-cı il aprelin 17-dən 880 yuana (123 dollar) və 2028-cı il aprelin 17-dən 1120 yuana (157 dollar) qaldırılacaq.

Həmçinin əgər ABŞ bayrağı altında üzən gəmi Çinin bir neçə limanına daxil olursa, xüsusi rüsum yalnız ilk limanda alınacaq.