Fərid Hacıyev: “Rəqəmsal iqtisadiyyatın inkişafı üçün daha əlverişli mühit yaradılıb”

“Dövlət başçısının xüsusi vurğuladığı strateji xətt çərçivəsində etibarlı kibertəhlükəsizlik sistemi formalaşdırılır və milli məlumat infrastrukturunun mühafizəsi istiqamətində addımlar atılır”.

presstvaz xəbər verir ki, bunu Milli Məclisin aparat rəhbəri Fərid Hacıyev “CIDC 2025 – Critical Infrastructure Defence Challenge” kibertəhlükəsizlik festivalının açılış mərasimində çıxışı zamanı deyib.

Onun sözlərinə görə, tədbirin artıq ikinci dəfə keçirilməsi onu göstərir ki, Azərbaycan innovasiyalar sahəsində sürətlə inkişaf edir və rəqəmsal təhlükəsizlik məsələlərinə ciddi önəm verir:

“Tədbir çərçivəsində iştirakçılar arasında təcrübə mübadiləsi aparılır, yeni texnoloji həllər təqdim olunur və rəqəmsal məkanın qorunması məsələləri müzakirə edilir. İkinci Qarabağ müharibəsi nəticəsində Azərbaycan öz ərazi bütövlüyünü və dövlət suverenliyini bərpa etdikdən sonra ölkəyə qarşı yeni tipli kibertəhdidlər artıb. Bunun qarşısını almaq məqsədilə Milli Məclis müvafiq qanunvericilik təşəbbüsləri ilə çıxış edib, informasiya təhlükəsizliyi ilə bağlı qanunlara dəyişikliklər edilərək kritik informasiya infrastrukturunun qorunmasına dair anlayışlar və məsuliyyətlər müəyyən olunub”.

“Eyni zamanda, informasiya texnologiyaları sahəsində fəaliyyət göstərən şəxslər üçün vergi güzəştləri tətbiq edilib, ölkədə innovasiyalara əsaslanan rəqəmsal iqtisadiyyatın inkişafı üçün daha əlverişli mühit yaradılıb. İnformasiya təhlükəsizliyi, innovasiya potensialı və beynəlxalq əməkdaşlıq çərçivəsində atılan addımlar Azərbaycanın rəqəmsal müstəqilliyini möhkəmləndirəcək və ölkənin gələcək inkişafına töhfə verəcək”, – deyə aparat rəhbəri əlavə edib.