Kobaxidze Gürcüstanda çevriliş cəhdinə beynəlxalq reaksiyanın olmamasını kəskin tənqid etdi

Gürcüstanın Baş naziri İrakli Kobaxidze kəskin açıqlama verərək bildirib ki, son günlər ərzində heç bir beynəlxalq təşkilat və ya dövlət ölkədə xalq tərəfindən seçilmiş hökumətin devrilməsi cəhdini pisləyən bəyanat verməyib.

presstvaz 1tv.ge portalına istinadla xəbər verir ki, hökumət başçısı bu fikirləri brifinqdə səsləndirib.

Onun sözlərinə görə, artıq dörd gündür ki, Gürcüstan prezidentinin iqamətgahına qarşı zorakı hücum həyata keçirilir və bu hücumların açıq şəkildə bəyan edilmiş məqsədi demokratik yolla seçilmiş hakimiyyəti devirmək olub.

“Lakin bu müddət ərzində nə bir təşkilat, nə də hər hansı dövlət – o cümlədən ABŞ, Avropa İttifaqı və onun ayrı-ayrı üzvləri – bu cəhdi pisləyən və ondan uzaqlaşan bəyanat verməyib. Əksinə, Aİ, ATƏT/DİİHB və digər subyektlər tam əks mövqedə çıxış ediblər”, – deyə baş nazir vurğulayıb.

Kobaxidze çıxışının sonunda qeyd edib ki, hakimiyyətin devrilməsi cəhdindən və zorakılıqdan uzaqlaşmamaq, onları pisləməmək çox asanlıqla bu cəhdlərə dolayı, amma aydın şəkildə dəstək kimi başa düşülür.