Nepalda etirazlar zamanı həbsxanalardan qaçan 8 mindən çox məhbus saxlanılıb

Nepalda etirazlar zamanı həbsxanalardan qaçan 14 mindən çox məhbusdan 8 mindən çoxu saxlanılıb. 6 mindən çox məhbus isə hələ də azadlıqdadır.

presstvaz xəbər verir ki, bu barədə “Khabarhub” Penitensiar Xidmətin İdarəetmə Departamentinin məlumatlarına istinadən məlumat yayıb.

İdarənin məlumatına görə, etirazlar zamanı Nepalda həbsxanalardan ümumilikdə 14 549 məhbus qaçıb. Hüquq-mühafizə orqanları 341-i azyaşlı olmaqla, 8 054 məhbusu saxlayıb. Polis qalan 6494 nəfərin axtarışını davam etdirir.

Onların axtarışı və tutulması üçün ordu və polis səfərbər edilib. Hüquq-mühafizə orqanlarının məlumatına görə, qaçanlar ictimaiyyət üçün ciddi təhlükə yaradır və cinayətkar dəstələr yarada bilərlər. İğtişaşlar zamanı ofislərdən və kazarmalardan 1200 odlu silah və təxminən 100 000 patron oğurlanıb.

Keçən həftənin əvvəlində Nepalın Katmandu və digər şəhərlərində korrupsiyaya və sosial mediaya qadağaya qarşı etirazlardan sonra iğtişaşlar başlayıb. Etirazçılar hökumət binalarını, o cümlədən parlament, Ali Məhkəmə və prokurorluq binalarını yandırıb, siyasətçilərin və məmurların evlərinə hücum ediblər. 70-dən çox insan həlak olub, 1300-dən çox insan yaralanıb.