"Labubu" kuklalarının bahalığının səbəbləri

"Pop Mart"ın rəhbəri Vanq Ninq bu il sərvətini 20 milyard dollar artırıb. "Labubu" oyuncaqlarına artan tələbat "Pop Mart International Group"un qurucusu və rəhbəri Vanq Ninqi dünyanın ən çox qazanan milyarderlərindən birinə çevirib.

presstvaz xəbər verir ki, "Yeni Sabah" "Labubu" kuklasının baha olmasının və ona tələbatın artmasının səbəblərini araşdırıb.

İlk baxışda sadə vinil fiqurlar kimi görünən bu kiçik kuklaların bəzilərinin qiyməti yüzlərlə, hətta minlərlə dollar səviyyəsinə qədər yüksəlir. Bunun səbəblərindən biri kuklaların məhdud buraxılışıdır. Tələbat yüksək, amma məhsul az olduğu üçün qiymətlər sürətlə qalxır.

Labubu obrazı Honq Konqlu dizayner Kenny Wong tərəfindən yaradılıb. Onun yaratdığı "The Monsters" seriyası dünya üzrə kolleksiyaçılar arasında böyük populyarlıq qazanıb. Dizayner brendləri həmişə adi oyuncaq istehsalçılarından daha bahalı olur, çünki onlar unikal dizaynla təqdim olunur, yüksək keyfiyyətli materiallardan istifadə edilir və məhsulun arxasında tanınmış bir sənətçi imzası var.

Labubu kuklalarının bahalı olmasının digər səbəbi onun adi oyuncaq deyil, kolleksiya əşyası kimi qiymətləndirilməsidir. Bəzi modellər yalnız xüsusi tədbirlərdə və ya lotereya üsulu ilə satışa çıxarılır.

Nəticədə, satış bitən kimi həmin nadir modellər ikinci əl bazarında 2-5 dəfə baha qiymətə təklif olunur.

Məsələn, ilkin satışda 60 dollara satılan limitli bir Labubu kuklasının qiyməti qısa müddətdə 300-500 dollara qədər yüksələ bilir.

Labubu kolleksionerləri arasında təkrar satış bazarı çox aktivdir. Məhdud buraxılışlı modelləri erkən əldə edən satıcılar, onları qısa müddətdə bir neçə qat baha qiymətə satışa çıxarır. Bu səbəbdən bəzi nadir Labubu modelləri hazırda hətta 1000 ABŞ dollarından baha qiymətə təklif olunur.

Labubu kuklaları yüksək keyfiyyətli vinil materialdan hazırlanır. Onların istehsalında incə detallar, əl işi boyama və xüsusi qablaşdırma istifadə olunur. Bu da onları ucuz, kütləvi istehsal olunan fiqurlardan fərqləndirir.

Bütün bunlara görə, "Labubu" kuklalarının bahalı olmasının əsas səbəbləri məhdud buraxılış, kolleksiya dəyəri, məşhur dizayner işi və bazarda yüksək tələbatdır. Dünyada kolleksiyaçılıq trendi artdıqca bu kuklaların qiyməti də yüksəlməyə davam edir.