Yazıçı-publisist Salman Alıoğlu 70 yaşını qeyd etdi

Mətbuat Şurasında yubiley məclisi: Qarabağ həqiqətlərini qələmə alan müəllifə hörmət

         Azərbaycanın tanınmış yazıçı-publisisti, jurnalist Salman Alıoğlu 70 illik yubileyini qeyd edib. Tədbir Mətbuat Şurasında təşkil olunub.

       İlk məqaləsi 1971-ci ildə işıq üzü görən Salman Alıoğlu indiyədək 25-dən çox qəzet və jurnalda 5 mindən artıq yazısı ilə çıxış edib. O, həm publisistika, həm də bədii yaradıcılıqda Qarabağ mövzusunu daim diqqət mərkəzində saxlayıb. Müəllifin “Müharibə”, “Ayrılıq olmayaydı”, “Bura Vətəndir”, “Göz yaşı qurumur”, “Yeri görünən insan” və “Gözü yolda qalan var” kitabları bu sahədə mühüm əsərlərdən sayılır. “Müharibə” əsəri 1995-ci ildə keçirilən müsabiqədə ikinci yerə layiq görülüb. Bu il isə Salman Alıoğlu “Azərbaycan Respublikası Prezidentinin fəxri diplomu” ilə təltif edilib.

       Mətbuat Şurasının sədri Rəşad Məcid yubiley tədbirində çıxış edərək Salman Alıoğlunun “Ağdam”, “Qarabağ”, “Ədalət” və “Respublika” qəzetlərindəki fəaliyyətini xatırladıb. O, təcrübəli qələm sahibinin peşəkarlığını gənc jurnalistlər üçün örnək adlandırıb.

       Tədbirdə iştirak edən əməkdar jurnalistlər və yazarlar — Elşən Əliyev, Rəşid Faxralı, Xanlar Məmmədov, Elxan Salahov və digərləri Salman Alıoğlunun əsərlərində Qarabağın işğalı, məcburi köçkünlərin ağrılı taleyi, erməni vandalizmi və 44 günlük Vətən müharibəsində qazanılan Zəfərin geniş əksini tapdığını vurğulayıblar. Onun yaradıcılıq nümunələrinin kənd həyatını da rəngarəng və canlı təsvir etdiyi bildirilib.

       Yubiley mərasimində istefada olan polis polkovniki Sadir Məmmədov, “Olimpiya dünyası” qəzetinin redaktor müavini Aslan Şahverdiyev də Salman Alıoğlu ilə bağlı xatirələrini bölüşüblər.

       Sonda yazıçı-publisistə Mətbuat Şurasının diplomu təqdim olunub.

   Rəşad CƏFƏRLİ,

  Mənbə: Presstv.az – Azərbaycan xəbər portalı

presstvaz  – Azərbaycanın etibarlı informasiya mənbəyi.