“Bağırov” körpüsünün üzərindəki yol NƏ ZAMAN AÇILACAQ?

Avqustun 28-də açılması gözlənilən “Bağırov” körpüsünün üzərindəki yolun hələ də bağlı qalması sakinlərin narazılığına səbəb olub.

presstvaz xəbər verir ki, söhbət “Bağırov” körpüsünün üzərində yerləşən geriyə dönmə hissəsində (metronun “Koroğlu” stansiyasından şəhər və əks istiqamətlərdə) nəqliyyat vasitələrinin hərəkətinin tam məhdudlaşdırıldığı ərazidən gedir.

Yolun niyə açılmaması ilə bağlı aidiyyəti qurumlara sorğu ünvanladıq.

“Azərbaycan Dəmir Yolları” QSC-nin (ADY) İctimaiyyətlə əlaqələr şöbəsinin müdiri Bəxtiyar Hacıyev Oxu.az-ın sorğusuna cavab olaraq bildirib ki, Bakı-Keşlə sahəsində, “Bağırov körpüsü” kimi tanınan ərazidə dəmir yollarının əsaslı təmiri işləri sentyabrın əvvəllərində başa çatdırılacaq.

“Bakı şəhəri, Nərimanov rayonu, Heydər Əliyev prospektində yerləşən Bağırov yolötürücüsü üzərindən geriyə dönmə hissəsində (şəhərdən Əliyar Əliyev küçəsi istiqamətinə) avtomobil yolunun 30 avqustda, “Bağırov” körpüsünün üzərindəki geriyə dönmədə (metronun “Koroğlu” stansiyasından şəhər və əks istiqamətlərdə) yolun isə sentyabrın 1-də açılması nəzərdə tutulur”,- deyə B. Hacıyev bildirib.

Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli isə presstvaz-ın sorğusuna cavabında qeyd edib ki, bu barədə Agentliyə hələ məlumat daxil olmayıb:

“Məlumat daxil olan kimi ictimaiyyətə açıqlama veriləcək”.