Tutduğu balıqdan cəmi yeddi kq ağırdır: ABŞ-də yeniyetmə rekordu ilə hər kəsi heyrətləndirdi

Şimali Kaliforniyadan (ABŞ) olan səkkizinci sinif şagirdi 29 kiloqram ağırlığında ağ dəniz xanı balığı tutub, bununla da dünya rekorduna namizəd olub.

presstvaz bu barədə rg.ru-ya istinadla xəbər verir.

Hadisə ailənin Tomales körfəzində kambala ovu üçün gəldiyi vaxt baş verib. Təxminən günorta saatlarında Culian fastfud yeyərkən əmisi spinninqin tutacaqda kəskin şəkildə əyildiyi barədə xəbərdar edib. Əvvəlcə Culian güclü balığı idarə etməyə çalışsa da, bunu bacarmayıb. Əmisi ona nəhəngi çıxarmağa kömək edəndən sonra onlar ovun həqiqi miqyasını anlayıblar.

Bildirilir ki, hadisə məktəblini sinif yoldaşları və balıqçılıq icması arasında dərhal məşhurlaşdırıb.

“Özümü ulduz kimi hiss edirəm”, – deyə Culian hisslərini bölüşüb.

Qeyd edək ki, yeniyetmənin özü rekord balıqdan cəmi yeddi kiloqram ağırdır, bu da nailiyyəti daha effektiv edir.

Hazırda ailə Floridadakı Beynəlxalq Balıq Ovu Assosiasiyası ilə əməkdaşlıq edərək ovu yeni dünya rekordu kimi təsdiqləməyə çalışır. Təsdiq ediləcəyi təqdirdə, Culianın balığı 2002-ci ildə qeydə alınmış 27 kiloqramlıq ağ dəniz xanısı üzrə əvvəlki “gənclər dünya rekordu”nu qıracaq. Ov həmçinin “qarmaq xəttinin möhkəmliyi” üzrə yeni gənclər sinfi rekordu müəyyən edəcək.

Culianın ovu təsdiqlənərsə, o, tarixdə dünya rekordu sahibi olan ən gənc balıqçılardan biri olacaq və balıqçılıq tarixində öz yerini möhkəmləndirəcək.