İsmayıl Bəqai: “İran və Ermənistan Zəngəzur razılaşmasını müzakirə edəcək”

Vaşinqtonda baş tutmuş Azərbaycan, Ermənistan və ABŞ liderlərinin görüşünə münasibət bildirən İran Xarici İşlər Nazirliyinin sözçüsü İsmayıl Bəqai deyib ki, bu gün və sabah Zəngəzur razılaşması ilə bağlı Tehran və İrəvan rəsmiləri arasında yüksək səviyyəli məsləhətləşmələr keçiriləcək.

“Azad İran” “Telegram” kanalı İran KİV-ə istinadən xəbər verir ki, İ.Bəqai bu barədə brifinqdə jurnalistlər qarşısında çıxış edərkən söyləyib.

Onun sözlərinə görə, Tehran Cənubi Qafqaz bölgəsində qonşu dövlətlərlə sıx əlaqələr saxlayır və həm Azərbaycan, həm də Ermənistanla münasibətlərdə mehriban qonşuluq və qarşılıqlı fayda prinsiplərinə əsaslanır.

İ.Bəqai vurğulayıb ki, sülh müqaviləsinin imzalanması məsələsi yeni deyil və İran əvvəllər də tərəfləri bu istiqamətdə təşviq edib.

Sazişin bağlanmasının regionda sülh və sabitlik üçün dönüş nöqtəsi ola biləcəyini deyən İ.Bəqai, İrəvanla keçiriləcək görüşlərdə vəziyyət barədə daha ətraflı məlumat alacaqlarını və lazım gələrsə, öz mövqelərini və narahatlıqlarını bölüşəcəklərini bildirib.