KİV: Tramp Azərbaycan və Mərkəzi Asiya ölkələrini “İbrahim sazişləri”nə cəlb etməyi düşünür

ABŞ Prezidenti Donald Trampın Administrasiyası Azərbaycan və bəzi Mərkəzi Asiya ölkələrinin “İbrahim sazişləri”nə qoşulması imkanını müzakirə edir.

presstvaz xəbər verir ki, bu barədə “Times of Israel” yazır.

Qeyd olunur ki, hazırda məsələyə dair danışıqlar davam edir. Bu addımın həmin ölkələrin İsraillə mövcud əlaqələrini daha da dərinləşdirməsini hədəflədiyi bildirilir.

Xatırladaq ki, “İbrahim sazişləri” çərçivəsində (2020-2021-ci illərdə Trampın ilk prezidentlik dövründə imzalanıb) dörd müsəlman ölkə ABŞ-nin vasitəçiliyi ilə İsraillə diplomatik münasibətləri normallaşdırmağa razılıq verib.

Azərbaycan və Mərkəzi Asiyadakı bütün ölkələr isə artıq İsraillə uzunmüddətli əlaqələrə malikdirlər. Buna görə də sazişin onları əhatə etməsi əsasən simvolik xarakter daşıyacaq və ticarət, hərbi əməkdaşlıq kimi sahələrdə əlaqələri gücləndirməyə yönələcək.

Vurğulanır ki, Tramp Administrasiyası Azərbaycan və Ermənistan arasında sülh sazişinin bağlanmasını “İbrahim sazişləri”nə qoşulmaq üçün şərt kimi irəli sürür.