Millimizdən dünya çempionatında böyük uğur

Azərbaycan Savat Federasiyası Gənclər və İdman Nazirliyinin dəstəyi ilə 2025-ci il üçün nəzərdə tutulmuş təqvim planına uyğun olaraq, 23–27 iyul tarixlərində Özbəkistanın Daşkənd şəhərində keçirilmiş Savate Assaut üzrə Gənclərin Dünya çempionatında uğurlu nəticələr əldə ediblər.

Bu barədə presstvaz-a federasiyadan məlumat verilib.

Məlumata görə, çempionatda Azərbaycan Savat Federasiyasının gənclərdən ibarət milli komandası 8 idmançı ilə təmsil olunub, yüksək nəticələr əldə edib. Milliyə rəhbərliyi baş məşqçi Taleh Nağızadə edib.

Dünya çempionatı üzrə 60 kq çəki dərəcəsində Ələkbər Xanməmmədov qızıl, Yusif Xəlilzadə (48), Ümid Zeynalov (52), Məhəmməd Məmmədli (56), Nicat Məhəmmədli (65), Nihat Quliyev (70), Əli Bəylərzadə (75), Məhəmməd Süleymanov (85) bürünc olmaqla ümumilikdə 8 medal qazanıblar.

Dünya Kuboku üzrə nəticələr isə belədir:

– 30 kq- Raul Hüseynzadə – qızıl medal ( Yeniyetmələr)

– 85 kq- Beyrək Bağırov – bürünc medal (Böyüklər)

– 35 kq- İbrahim İbrahimli – bürünc medal (Yeniyetmələr)

Ümümilikdə Dünya Kubokunda idmançılarımız Azərbaycanın aktivinə 3 medal qazandırıblar.