“iPhone” istifadəçiləri əməliyyat sistemini yeniləməyə çağırır – Təhlükəli boşluqlar aşkarlandı

İyulun 30-da “Apple” şirkəti “iOS 18.6” əməliyyat sisteminin yenilənməsini təqdim edib.

presstvaz-ın “iGuides”a istinadən məlumatına görə, “iOS 18.6” yenilənməsində əsas dəyişiklik həm şirkətin daxili mühəndisləri, həm də kənar tədqiqatçılar tərəfindən aşkar edilmiş 30-dan çox təhlükəsizlik boşluğunun aradan qaldırılmasıdır.

Aradan qaldırılmış səhvlər arasında “Foto” tətbiqindəki “Xatirələr” bölməsindən video göndərilməsi zamanı yaranan nasazlıq, həmçinin parol daxil etmədən cihazın söndürmə ekranına keçdikdə “Sağlamlıq” tətbiqinin məlumatlarının əlçatmaz olmasına səbəb olan xəta var.

Bundan əlavə, “Multicast” texnologiyasının işi təkmilləşdirilib ki, bu da çoxünvanlı məlumat ötürülməsinin optimallaşdırılması hesabına şəbəkə yükünü azaltmağa imkan verir.

Qeyd olunub ki, “iOS 18.6” yenilənməsi, əsasən sabitliyin, təhlükəsizliyin artırılmasına, normativ standartlara uyğunluğa yönəlib və yeni istifadəçi funksiyaları təqdim etmir. Buna baxmayaraq, ekspertlər cihazı potensial təhdidlərdən qorumaq üçün yenilənməni mümkün qədər tez quraşdırmağı tövsiyə edirlər.