Qvianalı jurnalist: “Azərbaycan bizim üçün nümunə ola bilər”

“3-cü Şuşa Qlobal Media Forumunda iştirak xarici jurnalistlərə Azərbaycanın Qarabağ bölgəsində aparılan tikinti-bərpa işlərinin miqyasını öz gözləri ilə görmək üçün unikal imkan yaratdı”.

presstvaz xəbər verir ki, bu barədə “Report”a açıqlamasında Fransız Qvianasından olan jurnalist Xavyer Nelson bildirib.

“Bu, çox faydalı və məzmunlu səfər oldu. Biz bölgə haqqında çox yeni məlumatlar əldə etdik və burada baş verən geniş və düşünülmüş dəyişiklikləri öz gözlərimizlə gördük. Azərbaycanın bu qısa müddətdə nələrə nail olması məni heyrətləndirdi. Azərbaycan güclü və məqsədyönlü ölkədir və mən gördüklərimə yalnız heyran ola bilərəm”, – deyə o qeyd edib.

Nelsonun sözlərinə görə, Azərbaycanın təcrübəsi müstəqilliyə və tarixi ədalətin bərpasına can atan xalqlar üçün ilhamverici nümunə ola bilər: “Cənubi Amerikada kiçik bir ölkənin sakini olaraq, hiss edirəm ki, Azərbaycan bizim üçün nümunə ola bilər. Siz müharibədən dərhal sonra təkcə ərazilərin bərpasına deyil, həm də tarixin qorunması işinə başladınız. Bu çox vacibdir. Görünür, burada hər addım düşünülüb və nəticə təsirlidir. Mənim üçün bu həqiqətən ilhamvericidir”.