Yaxın zamanda ABŞ-ni ölümcül “əsrin fırtınası” bürüyə bilər

Yeni tədqiqatlar göstərir ki, iqlim dəyişikliyi və qlobal istiləşmə səbəbindən ABŞ-də baş verən fırtınalar getdikcə daha ölümcül və dağıdıcı olur. Məhz buna görə yaxın zamanda ölkəni “əsrin fırtınası” adlanan güclü təbii hadisə bürüyə bilər.

presstvaz bu barədə CNN-ə istinadən xəbər verir.

Alimlər 1940-2025-ci illər arasında Şimal-şərq bölgəsində baş verən fırtınaları tarixi məlumatlar və siklon izləmə alqoritmi vasitəsilə araşdırıblar. Onlar bu fırtınaların rəqəmsal atlasını tərtib edib ümumilikdə 900 hadisəni analiz ediblər və ən güclü şimal-şərq küləklərinin maksimal sürətinin təxminən 6% artdığını aşkarlayıblar.

Pensilvaniya Universitetindən iqlimoloq Maykl Mannın sözlərinə görə, külək sürətinin 6% yüksəlməsi fırtınanın dağıdıcı potensialının 20% artmasına bərabərdir.

Bundan əlavə, dəyişikliklər əvvəlki qeydlərdən 10% daha çox yağıntıya səbəb ola bilər.

Mann həmçinin bildirib ki, ABŞ-də artıq müşahidə olunan ciddi daşqın riskləri də artır.

Qeyd edilir ki, əvvəlki “əsrin fırtınası” 1993-cü ilin mart ayında baş verib. O zaman küləyin sürəti saatda 100 mil (təxminən 44.7 m/s) olub və nəticədə, 200 nəfər həyatını itirib.