Nyu-York və Nyu-Cersi daşqınların əsarətində: Fövqəladə vəziyyət elan olundu

ABŞ-nin şərq sahili fırtına və leysan yağışlarının cəngindədir: Cəmi bir gecə ərzində yağan güclü yağışlar Nyu-York və Nyu-Cersi ştatının bir sıra rayonlarında daşqınlara, nəqliyyatın iflic olmasına və fövqəladə vəziyyət rejiminin tətbiqinə gətirib çıxarıb.

presstvaz bu barədə “MigNews”a istinadla xəbər verir.

Milli Meteorologiya Xidməti Nyu-York şəhərinin bütün beş rayonunda qəfil daşqın təhlükəsinə dair təcili xəbərdarlıq yayıb. Metro stansiyalarını su basıb, bəzi xətlərin hərəkəti müvəqqəti dayandırılıb, ciddi gecikmələr yaşanıb. Bir sıra əsas avtomagistrallar da bağlanıb. Hava limanları da ciddi şəkildə zərər görüb, təyyarələrin eniş və qalxışlarına məhdudiyyətlər tətbiq edilib ki, bu da yüzlərlə uçuşun gecikməsi və ləğv edilməsinə səbəb olub.

Nyu-Cersi ştatında Skoç-Pleyns, Somerset, Nort-Pleynfild, Rozel-Park şəhərlərində küçələr və evlər su altında qalıb. Bununla əlaqədar qubernator Fil Mörfi fövqəladə vəziyyət elan edib.

Sinoptiklərin proqnozlarına görə, güclü yağıntılar həftəsonuna qədər davam edəcək.