Pakistan ABŞ-yə çata biləcək raket hazırlayır

Pakistan ordusu ABŞ-yə çata bilən nüvə başlığına malik qitələrarası ballistik raketin yaradılması üzərində işləyir.

presstvaz xəbər verir ki, bu barədə “Foreign Affairs”in yeni hesabatında bildirilir.

Daha əvvəl qeyd olunmuşdu ki, Hindistanın “Sindur” əməliyyatından sonra Pakistan Çinin dəstəyi ilə nüvə arsenalını gücləndirməyə çalışıb.

Həm nüvə, həm də adi döyüş başlıqları ilə təchiz oluna bilən qitələrarası ballistik raketlər 5 500 km-dən çox məsafədəki hədəfləri vurmaq qabiliyyətinə malikdir.

ABŞ rəsmilərinə istinadla verilən məlumata görə, Pakistan belə bir raketi uğurla inkişaf etdirərsə, Vaşinqton bu ölkəni nüvə rəqibi hesab edəcək. Hazırda Rusiya, Çin və Şimali Koreya ABŞ-nin rəqibləri hesab olunur.

Qeyd edək ki, Pakistanın nüvə silahı proqramı 1970-ci illərin əvvəllərində, xüsusən də Hindistanın 1974-cü ildə ilk nüvə sınağını keçirməsindən sonra bölgədəki gərginlik səbəbindən başlayıb. Ölkə 1998-ci ildə altı nüvə sınağı keçirdikdən sonra rəsmi olaraq nüvə silahı dövlətinə çevrilib.