Sahibləri ürək xəstəliyinə meylli olan qan qrupları

Ürək-damar xəstəlikləri dünyada ölümün əsas səbəblərindən biri olaraq qalır.

Alimlər aşkar ediblər ki, bu cür xəstəliklərə meyllilik qan qrupundan asılı ola bilər.

presstvaz xarici mediaya istinadla bildirir ki, Harvard Xalq Sağlamlığı Məktəbinin araşdırmasına görə, A (II), B (III) və AB (IV) qan qruplarının daşıyıcıları O qan qrupu olanlara nisbətən ürək-damar xəstəliklərindən daha çox əziyyət çəkirlər. Ən yüksək ürək xəstəliyi riski 4 (AB) qan qrupu olan insanlarda aşkar edilib.

Araşdırmaçılar qeyd edirlər ki, insan öz qan qrupunu dəyişə bilməz, lakin riskləri anlamaq həkimlərə ürək-damar xəstəliklərinin ehtimalını daha yaxşı proqnozlaşdırmağa və xəstələrə daha dəqiq tövsiyələr verməyə kömək edəcək.

Riskləri necə azaltmaq olar?

Qan qrupunun dəyişməz qalmasına baxmayaraq, insanlar sağlam həyat tərzinə riayət etməklə ürək-damar xəstəliklərinin inkişaf riskini əhəmiyyətli dərəcədə azalda bilərlər. Balanslaşdırılmış pəhriz, fiziki fəaliyyət və siqaret çəkmək kimi pis vərdişlərdən qaçınmaq, xüsusən də yüksək risk qrupundasınızsa, riskləri azaltmağa kömək edə bilər.

Yalnız ürək deyil: Qan qrupunun digər xəstəliklərə təsiri

Alimlər onu da müəyyən ediblər ki, birinci qan qrupu (O) olan insanlar nəinki ürək-damar xəstəliklərindən az əziyyət çəkirlər, həm də mədə xərçənginə tutulma riski daha azdır.

Eyni zamanda, ikinci qrup (A) daşıyıcıları bu onkoloji xəstəliklə daha çox qarşılaşırlar. Tədqiqatçılar bunu qastrit və xoralara səbəb olan Helicobacter pylori bakteriyasına qarşı həssaslığın artması ilə əlaqələndirirlər.

Bundan əlavə, 4 (AB) qan qrupu olan insanlar qocalıqda bilişsel pozğunluqlara və yaddaş problemlərinə meyllidirlər və 2 (A) qan qrupu olan insanların bədənlərində çox vaxt stress hormonu olan kortizol səviyyəsi yüksəlir ki, bu da xroniki gərginliyə və narahatlığa səbəb ola bilər.

Niyə qan qrupunu bilmək lazımdır?

Qan qrupu haqqında məlumat yalnız transfüzyon üçün deyil, həm də müxtəlif xəstəliklərə meylliliyi qiymətləndirmək üçün vacibdir. Risklərinizi bilmək profilaktik tədbirləri vaxtında görməyə və uzun illər sağlamlığınızı qorumağa kömək edir./lent.az