Həkim Salvador Plasensiya “Dostlar”ın ulduzunun ölümündə iştirakını etiraf etdi

Həkim Salvador Plasensiya məhkəmədə faciədən əvvəl bir neçə həftə ərzində “Dostlar” serialının ulduzu Metyu Perrini narkotik maddələrlə təmin etməkdə təqsirini etiraf edib.

presstvaz bildirir ki, bu barədə “New York Times” xəbər verir.

Plasensiya dörd ittiham maddəsi üzrə təqsirli bilinərsə, ona 40 ilədək həbs cəzası və 2 milyon dollar məbləğində cərimə gözlənilir.

İstintaqın versiyasına görə, həkim bir neçə dəfə aktyorun evinə gələrək ona narkotik maddə yeridib. Onlar həmçinin ictimai avtomobil dayanacağında görüşüblər: Plasensiya aktyora avtomobilin arxa oturacağında preparatı inyeksiya edib.

Perri ilə bağlı işdə beş nəfərə qarşı ittiham irəli sürülüb, onlardan dördü artıq günahını etiraf edib. Prokurorların versiyası ilə yalnız “ketamin kraliçası” kimi tanınan narkotik satıcısı Casvin Sangha razılaşmayıb.

Xatırladaq ki, 54 yaşlı aktyor Perri 2023-cü ilin oktyabrın 28-də ketamin anestetikinin təsadüfi dozasını aşması nəticəsində vəfat edib. Bir qayda olaraq, bu vasitə depressiyanın müalicəsi, həmçinin rekreasiya məqsədləri üçün istifadə olunur. Sənətçi haqqında sənədli filmdən məlum olub ki, vəfatından üç gün əvvəl Perri psixi pozuntuların müalicəsi üçün həkim tərəfindən təyin olunmuş dozadan əlavə 27 doza ketamin alıb.