İsrail prezidenti İrana zərbələrlə bağlı danışdı

İsrail Prezidenti İsxak Hersoq İran ərazisinə zərbələr endirməklə ölkəsinin yəhudi xalqının varlığına qarşı təhdidləri neytrallaşdırmaq üçün məqsədyönlü əməliyyata başladığını bildirib.

presstvaz-ın xəbərinə görə, bu barədə o, “X” sosial şəbəkəsindəki səhifəsində paylaşım edib.

Onun sözlərinə görə, son onilliklər ərzində qlobal terror imperiyasının sükanı arxasında dayanan İran rejimi öz himayədarlarının köməyi ilə regionu radikallaşdırmaqda və sabitliyi pozmaqda davam edib, öz hərbi nüvə potensialını artırmaq və ballistik raket arsenalını genişləndirmək üçün yorulmadan çalışıb.

O, həmçinin İranı İsrail dövlətini məhv etmək niyyətində və bu planları reallıqda həyata keçirməyə çalışmaqda ittiham edib.

“İsrailin özünü müdafiə etmək üçün sarsılmaz hüququ və müqəddəs vəzifəsi var – və hər zaman bunu qəti və aydın şəkildə edəcək. Biz səmimi şəkildə ümid edirik ki, bu, regionumuzun inkişaf trayektoriyasını daha dinc və firavan gələcəyə doğru dəyişəcək”, – deyə Hersoq paylaşımda yazıb.

Xatırladaq ki, İsrail iyunun 13-nə keçən gecə İranın bir sıra nüvə obyektlərinə və paytaxt Tehrana zərbələr endirib. Güman ki, bir neçə yüksək rütbəli hərbçi və nüvə alimi öldürülüb.