Zəfər Küçükşabanoğlu: “Türkiyə süni intellekt indeksində 119 ölkə arasında 58-ci yerdədir”

“Biz hazırda dördüncü sənaye inqilabı dövründəyik. Türkiyə süni intellekt indeksində 119 ölkə arasında 58-ci yerdədir”.

presstvaz xəbər verir ki, bunu Azərbaycan mətbuatının 150 illiyi münasibətilə keçirilən xarici, eləcə də Azərbaycan və Türkiyə jurnalistlərinin görüşündə Süni İntellekt Siyasəti Dərnəyinin (AIPA) təsisçisi və rəhbəri Zəfər Küçükşabanoğlu deyib.

Onun sözlərinə görə, dünyada mətbuat dəyişir:

“Süni intellekt texnologiyası 2030-ci ilə qədər bazarda 15,7 milyard dollar həcmində paya sahib olacaq. Dünyanın ilk və yeganə süni intellekt universiteti və Süni İntellekt Nazirliyi məhz Birləşmiş Ərəb Əmirliklərindədir. Sinqapur 40 yaşdan yuxarı vətəndaşlarına süni intellekt dərsləri verməyə başlayıb. Bir yeni anlayış da var – texnofeodalizm. Məsələn, biz görmüşük ki, prezidentlərin andiçmə mərasimində arxa planda yeni seçilmiş prezidentin ailəsi olur, amma Donald Tramp and içəndə fonda Elon Mask dayanmışdı. Hesab edirəm ki, 2030-cu ildə süni intellekti öz həyatının bir parçasına çevirməyən insanlar iş yerlərini itirmək təhlükəsi ilə üzləşəcəklər”.