Luka Modriç karyerasını İtaliya A Seriyasında davam etdirə bilər

“Real Madrid”in yarımmüdafiəçisi Luka Modriçin klublararası dünya çempionatından sonra İspaniya klubundan ayrılacağı dəqiqləşsə də, karyerasını başa vurmaq niyyətində deyil.

presstvaz “AS” nəşrinə istinadən xəbər verir ki, o, Xorvatiya millisi DÇ-2026-ya vəsiqə qazanacağı halda həmin turnirdə iştirak etməyi planlaşdırır.

Modriç MLS klublarından təkliflər alıb. Dünya çempionatının ABŞ, Kanada və Meksikada keçiriləcəyini nəzərə alsaq, bu istiqamətdə davam etmək 39 yaşlı xorvat futbolçu üçün maraqlı ola bilər.

Digər tərəfdən, Modriç Avropada çıxışını davam etdirməyə də hazırdır. İddialara görə, təcrübəli oyunçuya “İnter” təklif göndərmək niyyətindədir. Milan klubu adətən yaşlı və təcrübəli futbolçuları heyətinə qatması ilə tanınır. Bildirilir ki, “İnter” Modriçə yalnız PSJ-yə qarşı keçirəcəyi Çempionlar Liqasının final matçından sonra rəsmi təklif göndərəcək.

Eyni zamanda, Luka Modriç iyun ayında “Real Madrid”lə klublararası dünya çempionatında iştirak edəcək, buna görə də danışıqlar yalnız iyulda başlaya bilər.