“Crocus City Hall”da insanları xilas edən məktəbliyə medal verildi

Krasnoqorskda (Rusiya) 16 yaşlı məktəbli İslam Xəlilov Rusiya Fövqəladə Hallar Nazirliyinin “Yanğından xilas edilməsinə görə” medalı ilə təltif edilib.

presstvaz xəbər verir ki, bu barədə qurumun “Telegram” kanalında məlumat verilib.

Bu mükafat həyati təhlükə ilə bağlı vəziyyətlərdə cəsarət və fədakarlıq nümayiş etdirən insanlara verilir.

Terror aktı baş verən zaman “Verşina” təhsil mərkəzinin 9-cu sinif şagirdi “Crocus City Hall” ticarət mərkəzinin qarderobunda işləyib. Fövqəladə vəziyyətdə o, cəsarət və soyuqqanlılıq nümayiş etdirib, panikaya düşməyib və göstərişə uyğun olaraq insanları binadan təxliyyə edib.

Onun cəsarətli hərəkətləri sayəsində yanan ticarət mərkəzindən 100-dən çox insan xilas olub.

Xatırladaq ki, terror aktı 2024-cü il martın 22-də axşam saatlarında Moskva vilayətinin Krasnoqorsk şəhərində yerləşən “Crocus City Hall” konsert zalında baş verib. “Piknik” qrupunun çıxışından əvvəl zala silahlı şəxslər daxil olaraq tamaşaçılara atəş açıblar. Bundan sonra partlayışlar olub və yanğın başlayıb. Hücum nəticəsində 150 nəfərə yaxın adam həlak olub, 500-dən çoxu xəsarət alıb. İŞİD terror aktının məsuliyyətini öz üzərinə götürüb. Rusiya İstintaq Komitəsi “terror aktı” maddəsi üzrə cinayət işi açıb.