“OpenAI” smartfon anlayışından fərqli cihaz yaratmaq üçün “io” startapını aldı

Süni intellekt sahəsində qabaqcıl şirkətlərdən biri olan “OpenAI” “Apple”ın sabiq baş dizayneri Conatan Ayva məxsus “io” adlı texnologiya startapını 6.4 milyard ABŞ dollarına satın alır.

presstvaz xəbər verir ki, bu barədə məlumatı CNBC yayıb.

Bildirilir ki, “io” şirkəti süni intellekt texnologiyası əsasında tamamilə yeni nəsil cihazlar hazırlamaq məqsədi ilə yaradılıb. Alqı-satqı razılaşmasından sonra Conatan Ayv həm “OpenAI”, həm də “io” komandasında yaradıcı və dizayn işlərinə rəhbərlik edəcək.

“OpenAI”AG-nin açıqlamasında bildirilir ki, məqsəd AGI – Ümumi Süni İntellekt dövrü üçün çoxfunksiyalı və innovativ məhsullar ailəsi yaratmaqdır. Şirkət bu sahədə dünyada ən nüfuzlu dizaynerlərdən biri hesab olunan Ayvın təcrübəsinə güvənir.

Xatırladaq ki, Conatan Ayv “Apple”da çalışdığı dövrdə “iPod”, “iPhone”, “iPad” və “MacBook Air” kimi məşhur məhsulların dizayn prosesinə rəhbərlik edib. O, 2019-cu ildə “Apple”dan ayrılıb və özünün “LoveFrom” adlı dizayn studiyasını yaradıb. Ayv bundan sonra da “LoveFrom” layihələri üzərində işləməyə davam edəcək.

Qeyd edək ki, “OpenAI” komandası hazırda ənənəvi smartfon anlayışından fərqli olan, gələcəyin texnologiyalarına uyğun tamamilə yeni bir cihaz üzərində işləyir.