Buz təbəqələrinin sürətlə əriməsinin dünyaya fəlakətli nəticələri açıqlandı

Qlobal istiləşmə qütb buzlaqlarının sürətlə əriməsinə səbəb olur və bu, dəniz səviyyəsinin bir metrə yaxın yüksəlməsi ilə nəticələnə bilər.

presstvaz-ın verdiyi məlumata görə, bu barədə beynəlxalq alimlər qrupunun “Communications Earth and Environment” jurnalında dərc olunmuş yeni araşdırmasında bildirilib.

Tədqiqatçılar müəyyən ediblər ki, hətta qlobal temperatur artımının 1.5°C səviyyəsində saxlanılması belə, Qrenlandiya və Antarktida buzlaqlarını xilas etməyə kifayət etmir. Hazırda Yer kürəsi sənaye dövrünə qədərki səviyyədən 1.2°C artıq istiləşib və bu da geri dönüşü olmayan buz itkisinə səbəb ola bilər.

Alimlər xəbərdarlıq edirlər ki, bu templə davam edərsə, sahil bölgələrində yaşayan yüzmilyonlarla insanın məcburi köçü qaçılmaz olacaq.

Hazırda 230 milyon insan dəniz səviyyəsindən bir metrdən aşağı yüksəklikdə yaşayır. Buzlaqlardakı cüzi dəyişiklik belə sahil xətlərini ciddi şəkildə dəyişdirə bilər. Bu isə iqtisadi və sosial fəsadlara səbəb ola bilər.