İran uranın zənginləşdirilməsi üçün hazırladığı yeni planı ABŞ-yə təqdim edib

Rəsmi Tehran ABŞ-nin investisiyası ilə uranın zənginləşdirilməsi üçün Yaxın Şərq ölkələrindən ibarət konsorsium yaratmağı təklif edib.

presstvaz xəbər verir ki, bu barədə “The New York Times” İranının diplomatik mənbələrinə istinadən məlumat yazıb.

Məlumata görə, bazar günü Omanda İranın xarici işlər naziri Abbas Əraqçı bu planı ABŞ prezidentinin xüsusi elçisi Stiven Uitkoffa təqdim edib.

Qeyd edilir ki, İran bu təşəbbüsə Vaşinqtonun nüvə proqramından tamamilə imtina tələbinə alternativ kimi baxır. Nəşr konsorsiumun mümkün iştirakçıları kimi Səudiyyə Ərəbistanı və Birləşmiş Ərəb Əmirliklərinin adını çəkib.

İranın təklifinə üçtərəfli nüvə konsorsiumunun yaradılması, Tehranın uranı 3.67%-ə qədər zənginləşdirməsi və mülki məqsədlər üçün digər ərəb ölkələrinə tədarük etmək imkanları daxildir. Bundan başqa, İranın nüvə obyektlərində digər ölkələrdən müşahidəçilərin, o cümlədən ABŞ-dən olan ekspertlərin iştirakı gözlənilir. Bu müqavilə 2015-ci il sazişindən fərqli olaraq, 15 illik müddətlə məhdudlaşmayacaq, yəni qeyri-müəyyən xarakter daşıya bilər.