Şampan qutularında gizlənən tarix: Argentinada təsadüfən Hitlerin imzası olan sənədlər tapıldı

Argentinanın Ali Məhkəməsinin köhnə binasında aparılan təmir işləri zamanı inanılmaz tarixi tapıntı aşkarlanıb. Belə ki, zirzəmidə, şampan qutularında Adolf Hitlerin imzası olan yüzlərlə sənəd tapılıb.

presstvaz-ın verdiyi məlumata görə, bu barədə “El Litoral” xəbər yayıb.

Sənədlər arasında nasist Almaniyasına aid pasportlar, xəritələr, svastika simvolları olan zərflər, təbliğat vərəqələri, habelə Argentina nasist partiyasının üzvlərinə dair qeyd dəftərləri yer alır. Qutularda, həmçinin Almaniyanın Yaponiyadakı səfirliyinin əməkdaşlarına aid şəxsi əşyaların da olduğu bildirilir.

Məhkəmə işçiləri bu qutuları köhnə binanın zirzəmisində ventilyasiya sisteminin təmiri zamanı aşkar ediblər.

Tarixçilərin qənaətinə görə, sənədlər 1940-cı illərə aiddir və ehtimal olunur ki, onlar 1941-ci il iyunun 20-də Yaponiyadan Argentinaya göndərilib.

Alman diplomatlar sənədləri Yaponiyaya geri qaytarmağa çalışıblar, lakin Argentina hakimiyyəti bunu etməkdən imtina edib və tapılan materialları müsadirə edib.

Ali Məhkəmənin nümayəndələri bildiriblər ki, sənədlər artıq xüsusi qoruma altına alınıb və binanın təhlükəsiz zonasına köçürülüb. Məqsəd – Holokost və Argentina ərazisində fəaliyyət göstərmiş nasist iyerarxiyası ilə bağlı yeni faktların üzə çıxarılması üçün bu materialların dərin araşdırmaya cəlb olunmasıdır.

Tarixçilər ümid edirlər ki, bu tapıntı İkinci Dünya müharibəsinin az tanınan səhifələrinə işıq salacaq və nasist rejiminin cinayətləri ilə bağlı daha geniş məlumat əldə olunmasına imkan yaradacaq.