Ançelotti “El-Klasiko”dakı məğlubiyyətin səbəblərini açıqlayıb

“Real Madrid”in baş məşqçisi Karlo Ançelotti İspaniya La Liqasının XXXV turu çərçivəsində keçirilmiş və 4:3 hesabı ilə “Barselona”nın qələbəsi ilə yekunlaşan “El-Klasiko” qarşılaşmasında komandasının məğlubiyyət səbəblərini şərh edib.

presstvaz bu barədə “Marca”ya istinadla xəbər verib.

Bildirilib ki, 64 yaşlı italiyalı mütəxəssis oyunun ilk dəqiqələrində “Real Madrid”in yaxşı təsir bağışladığını bildirib, lakin müdafiədəki kobud səhvlərin komandaya baha başa gəldiyini vurğulayıb.

“Belə oyunlarda həm hücumda, həm də müdafiədə effektiv çıxış etmək lazımdır. Biz bir neçə real qol imkanı yaratdıq, rəqibin qapısına üç dəfə yol tapdıq və, hətta iki dəfə də ofsayddan qol vurduq. Hücum baxımından komanda strukturlaşdırılmış şəkildə oynadı. Lakin müdafiədə buraxılan ciddi səhvlər nəticəyə birbaşa təsir etdi. Futbolçular son dəqiqəyə qədər mübarizə apardılar. Bu, iki böyük klubun qarşıdurması idi və oyunçularımın əzmkarlığına və əhvali-ruhiyyəsinə iradım yoxdur”, – deyə Ançelotti qeyd edib.

Çempionlar Liqasını dörd dəfə qazanmış təcrübəli mütəxəssis, həmçinin braziliyalı hücumçu Rodriqo ilə aralarında yaranmış münaqişə barədə yayılan iddiaları da təkzib edib.

Xatırladaq ki, Ançelotti sözügedən qarşılaşmada 23 yaşlı futbolçunu meydana buraxmamış, bu isə ispan mətbuatında mübahisələrə səbəb olmuşdu. Baş məşqçinin sözlərinə görə, qərar yalnız futbolçunun fiziki durumuna əsasən verilib:

“Rodriqo ilə aramızda heç bir problem yoxdur. O bu oyuna tam hazır deyildi. Onu cəmi 5-7 dəqiqəlik meydana buraxmaq ciddi zədə riski yarada bilərdi. Bu isə əsassız risk olardı”.