Tabutda ayılmaq mümkündür? – Mütəxəssis son nöqtəni qoydu

Əfsanələrdə və filmlərdə tez-tez rast gəlinən bir səhnə var: insan letargiya yuxusuna gedir, öldü hesab edilərək dəfn olunur, lakin daha sonra tabutda ayılır. Bəs bu, gerçək həyatda nə dərəcədə mümkündür?

presstvaz-ın gazeta.ru-ya istinadla verdiyi məlumata görə, rusiyalı məhkəmə-tibb eksperti Aleksey Reşetun bu barədə bütün suallara aydınlıq gətirib.

Onun sözlərinə görə, “letargiya yuxusu” adlandırılan hal tibbi baxımdan real və təsdiqlənmiş bir fenomen deyil.

“Bu anlayış müxtəlif xalq əfsanələrinin və ədəbi uydurmaların məhsuludur. Reallıqda belə bir hal müşahidə olunmayıb” , – deyə Reşetun bildirib.

Ekspert qeyd edir ki, müasir tibbi protokollar və ölümün çoxmərhələli təsdiqləmə sistemi insanın səhvən morqa və ya tabuta yerləşdirilməsi ehtimalını demək olar ki, sıfıra endirir.

Əlbəttə, mütəxəssis etiraf edir ki, bu ehtimalı tamamilə istisna etmək mümkün deyil. Lakin bu, yalnız ucqar bölgələrdə, tibbi infrastrukturun zəif olduğu yerlərdə və ya fövqəladə hallar, məsələn, təbii fəlakətlər zamanı mümkündür. Belə hallar isə son dərəcə nadir və spesifik nümunələrə aiddir.

Bəs ölüm necə təsdiqlənir?

Reşetun izah edir ki, ölüm halı müəyyən edildikdə dərhal təcili yardım çağırılır. Əgər meyitdə artıq çürümə, mumiyalaşma və ya skeletləşmə kimi gecikmiş meyit dəyişiklikləri yoxdursa, tibb işçiləri ölüm əlamətlərini yoxlayırlar. Bunlara aşağıdakılar daxildir:

– Ürək fəaliyyətinin olmamasını göstərən kardioqram;

– Əzələlərin qıc olması (ölüm qıcolması);

– Meyit ləkələri və digər ilkin dəyişikliklər.

Bütün bu müşahidələr əsasında “ölümün təsdiqlənməsi” adlı xüsusi sənəd tərtib olunur. Daha sonra hadisə yerinə ya istintaq qrupu, ya da sahə müvəkkili çağırılır. Morqa aparılarkən isə meyit əlavə müayinədən keçirilir, foto çəkilir və yenidən qeydlər aparılır.

“Bütün bu prosedurlar səhvləri demək olar ki, istisna edir. Mən şəxsən belə halların gerçək olaraq baş verdiyinə dair heç bir inandırıcı sübutla qarşılaşmamışam” , – deyə Reşetun vurğulayıb.