Fransa nüvə danışıqlarının bərpası fonunda İrana yeni səfir təyin edir

Fransa prezidenti Emanuel Makron İrana yeni səfir təyin edir – bu, hazırda Serbiyada səfir olan Pyer Koşar olacaq.

“Azad İran” “Telegram” kanalı bu barədə Fransanın xüsusi xidmət orqanlarının ruporı olan “Intelligence Online”a istinadla məlumat verir.

Qeyd olunur ki, təyinat Tehranın təsdiqi ilə baş tutacaq və Amerika-İran nüvə proqramı üzrə danışıqların bərpası fonunda Parisin diplomatik səylərinin bir hissəsi olacaq.

“Yeni səfirin qarşısında mürəkkəb vəzifələr duracaq – nüvə danışıqlarında iştirakdan tutmuş İranda həbsdə olan Fransa vətəndaşlarının maraqlarının müdafiəsinə qədər. Bundan əlavə, o, əvvəllər İran müxalifəti ilə əlaqə saxlayan və Tehranın kəskin reaksiyasına səbəb olan Makronun müşaviri Pol Solerin təsirini nəzərə almalı olacaq”, – deyə məqalədə qeyd olunur.

Pyer Koşar ENA-nın (Fransada Milli İdarəetmə Məktəbi) məzunudur, fars dilini bilir və diplomatik karyerasına 1994-cü ildə Tehranda başlayıb.