BƏƏ qanunların hazırlanmasını süni intellektə həvalə etməyə hazırlaşır

Birləşmiş Ərəb Əmirlikləri (BƏƏ) dünyada yeni qanun layihəsinin hazırlanmasına və mövcud qanunlara düzəlişlərə kömək etmək üçün süni intellektdən (AI) istifadə edən ilk ölkə olmağı planlaşdırır.

presstvaz xəbər verir ki, bu barədə “Financial Times” (FT) qəzeti məlumat verib.

Qeyd olunur ki, bu texnologiya üçün BƏƏ milyardlarla dollar sərmayə qoyub.

BƏƏ-nin baş naziri Məhəmməd bin Rəşid əl-Məktum əmindir ki, süni intellektdən istifadə qanunların yaradılması prosesini daha sürətli və daha dəqiq edəcək. Hökumət süni intellektin tətbiqinin qanun yaradıcılığının sürətini 70% artıracağını gözləyir. Bundan əlavə, bu texnologiyanın köməyi ilə BƏƏ hakimiyyəti qanunların ölkə əhalisinə və iqtisadiyyatına təsirini izləmək niyyətindədir. Bu iddialı planları həyata keçirmək üçün federal və yerli qanunlar, məhkəmə qərarları və dövlət xidmətləri haqqında məlumatlar daxil olmaqla geniş miqyaslı məlumat bazası yaradılacaq.

Bununla belə, süni intellektin qanunları insanlar kimi şərh edə bilməməsi riski, həmçinin sistemin etibarlılığı və davamlılığı ilə bağlı uğursuzluqlar və problemlərin yaranacağı ehtimalı var.