Deputatdan təklif: “TÜRKPA-da təhlükəsizlik çağırışlarına qarşı müdafiə strategiyası hazırlansın”

“Son dövrlərdə dünyada geosiyasi gərginliklər artıb, regional münaqişələr və qeyri-ənənəvi təhlükəsizlik təhdidləri gündəmə gəlib. Bu vəziyyət bizləri daha yaxın əməkdaşlığa, birgə müdafiə strategiyalarına və effektiv təhlükəsizlik əməkdaşlığına çağırır. Türk dövlətləri olaraq biz bu təhdidləri yalnız birlikdə aradan qaldıra bilərik. Bu baxımdan, mən bugünkü toplantımızda bir neçə təkliflə çıxış etmək istəyirəm”.

presstvaz xəbər verir ki, bu sözləri Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Səbinə Salmanova Türk Dövlətləri Təşkilatının Parlament Assambleyasına (TÜRKPA) üzv ölkələrin parlamentlərinin müdafiə və təhlükəsizlik üzrə komitələrinin sədrlərinin ikinci iclasında çıxışı zamanı deyib.

O təklif edib ki, TÜRKPA ölkələri arasında ortaq təhlükəsizlik çağırışlarına qarşı müdafiə və təhlükəsizlik strategiyası hazırlansın:

“Hesab edirəm ki, bu strategiya regiondakı əsas təhdidləri nəzərə alaraq birgə müdafiə siyasətinin formalaşdırılmasına öz töhfəsini verəcək. Hibrid təhdidlər, terrorizm və kiberhücumlar kimi təhlükələrə qarşı ortaq yanaşmaların müəyyən edilməsi məqsədilə bu strategiya üzv ölkələr arasında koordinasiyanı təmin edəcək”.

“Bundan başqa, təklif edirəm ki, komitələrimiz arasında daha sıx əməkdaşlığımızla bağlı saziş imzalansın. Bu sazişlə Müdafiə və Təhlükəsizlik Əməkdaşlığı üzrə Koordinasiya Şurası da yaradıla bilər. Komitə rəhbərləri və əsas üzvlərdən ibarət olacaq şura mütəmadi iclaslar vasitəsilə regional təhlükəsizlik gündəliyini və strateji qərarlar qəbul etsinlər. Alt işçi qrupları (kiber təhlükəsizlik, sərhəd təhlükəsizliyi və s.) fəaliyyət göstərsin.

Hesab edirəm ki, bu Koordinasiya Şurasının yaradılması, təkcə təhlükəsizlik sahəsində əməkdaşlığı gücləndirmək deyil, eyni zamanda, parlament diplomatiyasının mühüm bir elementi kimi regional sabitliyə və sülhə töhfə verəcək. Eyni zamanda, dövlətlərin milli maraqlarını qorumaqla yanaşı, ortaq təhlükəsizlik mühitinin formalaşmasına da şərait yaradacaq, – deyə deputat vurğulayıb.

O, digər təklifinin qanunvericilik bazalarının uyğunlaşdırılması ilə bağlı olduğunu bildirib:

“Bununla əlaqədar ortaq hüquqi elektron portal da yaradıla bilər. Bu portal vasitəsilə təcrübə və məlumat mübadiləsi təşkil oluna bilər”.