Planetin ən varlı insanları 24 saata 200 milyard dollardan çox itirdilər

ABŞ Prezidenti Donald Trampın bir sıra ölkələrə qarşı idxal rüsumlarının tətbiqini elan etməsindən cəmi 24 saat sonra planetin ən varlı insanları ümumilikdə 200 milyard dollardan çox vəsait itiriblər.

presstvaz-ın verdiyi məlumata görə, bu barədə “Bloomberg” agentliyi paylaşım edib.

“Cümə axşamı, aprelin 3-də, dünyanın 500 ən varlı insanının ümumi sərvəti Prezident Donald Trampın elan etdiyi tariflər səbəbindən rekord dərəcədə – 208 milyard dollar azalıb”, – deyə agentliyin materialında vurğulanıb.

Bu çöküş, “Bloomberg” reytinqinin 13 illik tarixində dördüncü və 2020-ci ildə dünya iqtisadiyyatına ciddi zərbə vuran COVID-19 pandemiyasının pik nöqtəsindən sonra ən böyükmiqyaslı çöküşdür.

Ən çox amerikalı milyarderlər zərər çəkiblər, onların arasında “Facebook”un qurucusu Mark Zukerberq və “Amazon”un rəhbəri Ceff Bezos liderlik edirlər.

Cəmi bir gün ərzində Zukerberq 17.9 milyard dollar, Bezos 15.9 milyard dollar, “Tesla”nın baş direktoru İlon Mask 11 milyard dollar, lüks LVMH konqlomeratının sahibi Bernard Arno isə 6 milyard dollar itiriblər.

Donald Trampın amerikalı istehsalçıları qorumaq məqsədi daşıyan idxal rüsumlarının tətbiqi haqqında qərarı dünya bazarlarında domino effektinə və planetin ən varlı insanları üçün ciddi maliyyə itkilərinə səbəb olub. Bu mənfi trendin nə qədər davam edəcəyi və ABŞ-nin proteksionist tədbirlərinin qlobal iqtisadiyyat üçün daha hansı nəticələri olacağı hələ aydın deyil.